ກົດໝາຍອາຍາມາດຕາທີ 64 ສາເຫດທີ່ພາໃຫ້ມີການຫຼຸດຜ່ອນຄວາມຮັບຜິດຊອບທາງອາຍາ

ສາເຫດທີ່ພາໃຫ້ມີການຫຼຸດຜ່ອນຄວາມຮັບຜິດຊອບທາງອາຍາມີ ດັ່ງນີ້:

1.ຜູ້ກະທຳຜິດມີອາຍຸຕ່ຳກວ່າສິບແປດປີ ຫຼື ເກີນກວ່າ 60 ປີ.

2.ຜູ້ກະທຳຜິດ ແມ່ນຜູ້ຍິງຖືພາ ຫຼື ແມ່ທີ່ມີລູກອ່ອນອາຍຸແຕ່ 3 ປີລົງມາ.

3.ການປ້ອງກັນຕົວເກີນຂອບເຂດ.

4.ການກະທຳຜິດຍ້ອນຖືກແຕະຕ້ອງທາງດ້ານຈິດໃຈຢ່າງໜັກ ຈົນບໍ່ສາມາດຄຸມສະຕິໄວ້ໄດ້ ດ້ວຍການກະທຳອັນບໍ່ຖືກຕ້ອງຕາມກົດໝາຍຂອງຜູ້ຖືກເຄາະຮ້າຍ.

5.ການກະທຳເກີນຄວາມຈຳເປັນ.

6.ການກະທຳຜິດໃນສະຖານຄະຣຸໂທດ ຍ້ອນຖືກບັງຄັບ ຫຼື ຖືກຂົ່ມຂູ່.

7.ຜູ້ກະທຳຜິດຢັບຢັ້ງ ແລະ ແກ້ໄຂຜົນເສຍຫາຍຂອງການກະທຳຜິດທີ່ຕົນໄດ້ກໍ່ຂຶ້ນ ຫຼື ໄດ້ຈິງໃຈໃຊ້ແທນຄ່າເສຍຫາຍໂດຍສະໝັກໃຈແລ້ວ.

8.ການກະທຳຜິດຍ້ອນສະພາບຫຍຸ້ງຍາກໜັກໜ່ວງທາງສ່ວນຕົວ ຫຼື ທາງຄອບຄົວ.

9.ຜູ້ກະທຳຜິດຮູ້ສຶກກິນແໜງ ແລ້ວຈິງໃຈມອບຕົວຕໍ່ເຈົ້າໜ້າທີ່, ຮັບສາລະພາບ ແລະ ເປີດເຜີຍການກະທຳຜິດຂອງຕົນ ແລະ ການກະທຳຜິດຂອງຜູ້ອື່ນ.

10.ການກະທຳຜິດຄັ້ງທຳອິດ ຖ້າວ່າການກະທຳຜິດຄັ້ງດັ່ງກ່າວ ຫາກບໍ່ເປັນອັນຕະລາຍຮ້າຍແຮງຕໍ່ສັງຄົມ.

11.ຜູ້ກະທຳຜິດທີ່ໄດ້ມີຄຸນງາມຄວາມດີຕໍ່ປະເທດຊາດ.

ໃນການວາງໂທດນັ້ນ ສານອີງໃສ່ສາເຫດອື່ນ ທີ່ພາໃຫ້ມີການຫຼຸດຜ່ອນຄວາມຮັບຜິດຊອບທາງອາຍາ ທີ່ບໍ່ໄດ້ກຳນົດໄວ້ໃນມາດຕານີ້ກໍໄດ້.